Nov 4, 2012

احبسني ... شكرا

احبسني ... شكرا

احبسني 


هو ده اللي حاصل 

 احنا بنتحبس 
 محبوسين بالفعل وبنتحبس اكتر 

احبسني  فعليا ... واحبسني نفسيا


احبسني فعليا لما ابقى مش عارفة اخرج من بيتي 

ولو خرجت مش هاعرف اروح في حتة 
 اصل هاروح فين 
 ما الطريق مقطوع 
طريق السكة الحديد الاساماعيلية القاهرة مقطوع عند مدينة القصاصين ومفيش قطر هيعدي 
وطريق الاسماعيلية الزقازيق مقطوع عند مدينة ابو حماد علشان سواقين ابوحماد قرروا يقطعوا الطريق لانهم عاوزين يرفعوا الاجرة
وطريق القصاصين القاهرة مقطوع عند الدواويس  بسبب المشاكل اللي في القصاصين وضرب النار 

احبسني نفسيا 

احبسني جوة خوفي 

خوفي دلوقت على اختي اللي في الزقازيق في كليتها هي وزمايلها اللي من المدينة هنا وقرروا يروحوا الكلية 


ولا انا المفروض اقول اصل هي ايه اللي وداها اصلا ؟؟

اه 
مانا لازم اقول كدة 
هي اللي غلطانة 
انها قررت تروح الكلية 
مش غياب الامن مثلا هو اللي غلط ( مفيش عسكري واحد في مدينة القصاصين  اللي السكة الحديد مقطوعة فيها )
مش الرعب وضرب النار اللي منتشر هو اللي غلط ( مفيش اي كمين على طريق القصاصين القاهرة اللي العرب قاطعينه بالسلاح )
مش عدم التعامل مع مطالب الناس وتجاهلهم هو اللي غلط ( مفيش حد يتكلم مع السواقين في مدينة ابو حماد علشان يفتحوا الطريق للناس والعربيات )
لا 
هي اللي غلط انها راحت الكلية 


احبسني نفسيا .

احبسني جوة دهشتي 
دهشتي ان كل افراد الامن دول  راحوا يأمنوا الريس في زيارته
ومفيش فرد امن واحد حوالينا ... الكمين الوحيد للامانة 
موجود عند بوابات الاسماعيلية  ( طريق القاهرة اسماعيلية الصحراوي ) والعدد اللي فيه مايقدرش يقاوم  اي انفلات امني 
وباقي الطرق فاضية 
صحراااااااااااا 
ولما أسأل ازاي الشرطة سايبة الناس تقطع الطريق 
يتقال اصل كل افراد الامن خافوا من الاهالي فقرروا ينفدوا بجلدهم لحسن يتضربوا 


احبسني فعليا 

لما اقرر ان من الافضل اني مااخرجش لان الخروج يعني مخاطرة 
واستنى شوية لما الامور تهدى 
 وفي مصر بلدي الحبيبة الامور ابدا لا تهدأ

احبسني فعليا

ما انت قررت انن افضل حاجة علشان بلدنا تبقى حلوة اننا نضلمها من الساعة 10 او 11 
والناس تتلم في بيوتها ونعمل جو أسري لطيف ... ونقعد في البيت نضرب اخماس في اسداس ياترى البلطجة هتزيد والرعب هيزيد لما البطالة تزيد بسبب تسريح العمالة اللي كانت بتشتغل بالليل 

احبسني  نفسيا

احبسني جوة أسألتي 
ماانت مش بترد وبترفض تفهمني 
لما  المذيعة تقرر تسأل الوزير عن القرار وهو يقرر يقفل في وشنا كلنا الخط علشان مش عاجبه نسأل


احبسني نفسيا

احبسني جو ذهولي 
هو انا كنت بحلم بمصر جديدة  حرة 
ولا مصر محبوسة في بيوتها من الخوف بسبب غياب الامن
ولا مصر مضلمة من الساعة 11 علشان نرشد الاستهلاك 
ولا مصر مفلسة بسبب ان احنا مش هنزود الانتاج لا هنقطع الارزاق


احبسني 

طيب حبستني خلاص

يلا بقى تفرغ لأهم القضايا

تفرغ بقى للسماح للضباط باطلاق اللحية 
اصل الدين يعني لحية مش يعني ادي عملك باتقان وشوف شغلك واحمي اهل بلدك اللي  المفروض تسهر على امنهم

حبستني خلاص 

طيب يلا بقى اتفرغ للتفكير في مشاريع اقتصادية عملاقة  ومنح بالملايين والمليارات
اصل يافرحتي وانا عندي فلوس بس مرعوب اخرج اصرفها 

حبستني خلاص

طيب يلا بقى  ابتدى طبق الشرع
ماانت سايب كل واحد ينصب نفسه قاضي يحاسب الناس اذا كانت مطبق الشرع ولا لا
وكله بما يرضي الله


على فكرة انا عارفة ان كلها يوم ولا اتنين والطريق يتفتح وكله يبقى تمام 

بس هي الفكرة 
هل احنا بقى فرض علينا كل شوية نترعب كدة 
وهل اد كدة الامن مش مهم لدرجة ان كل المسئولين سايبينه على حالته المتردية دي 
هذا هو الاداء الامني في بلدنا
وبرضه الظابط وشوية العساكر لما يخافو ويهربوا ويحافظوا على حياتهم معزورين لان مفيش قوات بتعززهم 
حط نفسك مكان اي حد فيهم هتلاقي ان حياتك غالية عندك ومن حقك تحافظ عليها
المنظومة كلها بايظة 
احنا اه  محتاجين رغيف العيش والمواصلات والمرتب 
بس كمان محتاجين أمن وامان علشان نقدر نتمتع بكل ده



2 التعليقات:

لــــ زهــــــراء ــــولا said...

بسكووووووووووووووته


احبسنى جوه دهشتى جمله بسيطه لكنها حبست الكثير من المعانى بداخلها
عارفه يا حبى اهم من رغيف العيش هو تواجد الامن والامان عن جد حاسه بكل حرف مكتوب كأنى عايشه فيه ورغم انى مش من الاسماعيليه لكن حلها هو حال الاسكندريه والقاهره واحوال كل المدن شبه بعض
احوال مصر كلها شبه بعضها الجو العام كئيب الناس بطلت تضحك كل واحد فاكر نفسه انه قاضى وكل الباقى مذنبيين ولازم نسمع كلام اى واحد فاكر نفسه قاضى
اللى مربى دقنه يبقى بيعرف فى الدين اكتر من اللى حلقها واللى لابسه خمار لازم نحترمها اكتر من اللى شعرها عريان وهكذا
ناس غريبه بتحكم على المظهر ومش مهم الجوهر
ربنا يرحمنا من اللى جاى علينا يارب
وحشااااااااااااانى اوى اوى
زهراء

Baskouta said...

زهراااااء
حبيبتي
ازيك ياجميلة
ميرسي ياحبيبتي على الكومنت
وميرسي انك دايما فاكراني
وبتنوريني
ومعلش ان انا مقصرة ومش بسأل

:)
بس انا ببقى مبسوطة اوي لما بشوف تعليقك